Дэлегацыя Магілёўскага інстытута МУС у складзе начальніка інстытута генерал-маёра міліцыі Валерыя Палішчука, начальніка кафедры крымінальнага працэсу і крыміналістыкі падпалкоўніка міліцыі Юрыя Матвейчава і намесніка начальніка кафедры сацыяльна-гуманітарных дысцыплін старшага лейтэнанта міліцыі Сяргея Венідзіктава з 27 па 29 траўня 2015 г. знаходзілася з афіцыйным візітам ў Акадэміі Федэральнай службы выканання пакаранняў Расіі (г. Разань).

Падчас рабочай сустрэчы кіраўніцтва Акадэміі ФСВП Расіі з дэлегацыяй інстытута бакі абмеркавалі сучасны стан падрыхтоўкі спецыялістаў для праваахоўных органаў, а таксама перспектыўныя накірункі ўзаемадзеяння паміж навучальнымі ўстановамі. Начальнік Акадэміі ФСВП Расіі генерал-маёр унутранай службы Аляксандр Крымаў і начальнік Магілёўскага інстытута МУС генерал-маёр міліцыі Валерый Палішчук падзякавалі адзін аднаго за дзелавыя і сяброўскія адносіны, якія склаліся паміж установамі, і выказалі надзею на далейшае плённае супрацоўніцтва. У межах сустрэчы адбылося ўзнагароджанне Валерыя Палішчука памятным медалём "80 гадоў Акадэміі ФСВП Расіі".

28 траўня начальнікам кафедры крымінальнага працэсу і крыміналістыкі Юрыем Матвейчавым быў праведзены семінар па дысцыпліне «Крымінальны працэс» са слухачамі спецкурса Акадэміі ФСВП Расіі.

Намеснік начальніка кафедры сацыяльна-гуманітарных дысцыплін Сяргей Венідзіктаў правёў рабочую сустрэчу з кіраўнікамі кафедр псіхалагічнага факультэта Акадэміі, падчас якой дасягнута дамоўленасць аб арганізацыі сумеснай навуковай канферэнцыі і аб калектыўнай падрыхтоўцы вучэбна-метадычных выданняў.

Дэлегацыя інстытута таксама азнаёмілася з матэрыяльна-тэхнічнай і вучэбна-метадычнай базай Акадэміі ФСВП Расіі, наведала вышэйшыя акадэмічныя курсы, факультэт кіравання і факультэт павышэння кваліфікацыі і першапачатковай падрыхтоўкі, агледзела абсталяваны сучаснай мультымедыйнай тэхнікай кабінет педагагічнага майстэрства, навучальны палігон "Спецыяліст-паліграфолаг", спартыўны комплекс, баявы стралковы апаратна-праграмны комплекс.

Фота прэс-службы Акадэміі ФСВП Расіі